ძვირფასო აუდიტორიავ, ვინ ხარ?

მიმდინარე თავში შევაჯამებთ ხორვატიაში, „დოკუკინოში,” სხვადასხვა აუდიტორიისთვის გამართული კინოჩვენებების გამოცდილებას. ჩვენს პროგრამას, პირველ რიგში,  მიმდინარე სოციალური საკითხები განსაზღვრავს. პროგრამაში წარმოდგენილი ფილმები ინოვაციური მიდგომებით და მხატვრული ხერხების გამოყენებით სოციალურად და პოლიტიკურად რელევანტურ თემებს ეხმიანება, როგორიცაა: ჯენტრიფიკაცია, ეკოლოგია, მიგრაცია, კოლონიური მემკვიდრეობა, საერთო სიკეთის დაცვა, სქესობრივი და გენდერული თანასწორობა, სოციალური ცვლილებები, დემოკრატიზაციასთან და მონაწილეობასთან დაკავშირებული საკითხები, მედია და საზოგადოებრივი სფერო, ალტერნატიული ეკონომიკური მოდელები.  ჩვენ ვირჩევთ საკამათო და დელიკატურ თემებს და დოკუმენტური ფილმების მეშვეობით ამ საკითხების შესახებ დიალოგის დაწყებას ვახალისებთ. ფილმის ჩვენებას მოჰყვება დისკუსია, რომელსაც როგორც წესი, მოდერაციას უწევენ − მივესალმებით განსხვავებულ მოსაზრებებს და ხელს ვუწყობთ კრიტიკული აზროვნების პროცესს.

1. აქტიურად ადევნეთ თვალი მიმდინარე ამბებს, გამოყავით სოციალური და პოლიტიკური მნიშვნელობის თემები და წაახალისეთ ამ საკითხების შესახებ დისკუსია;

2. მიიღეთ გაბედული, კრეატიული გადაწყვეტილებები პროგრამის შედგენისას, ნურასდროს დააკნინებთ თქვენს აუდიტორიას;

3. პროცესში ჩართეთ გარშემომყოფები და იყავით ღია მათი შემოთავაზებებისთვის − უზრუნველყავით აუდიტორია მრავალფეროვანი პროგრამით და წაახალისეთ მათი ჩართულობა;

4. მცირე ჟესტებით მაყურებლებს თავი მყუდროდ და კომფორტულად აგრძნობინეთ, რათა შემდეგ ჩვენებებზე თქვენს სივრცეს კვლავ ესტუმრონ;

5. ნუ შემოიფარგლებით მხოლოდ ფილმის ჩვენებით, ამის ნაცვლად დასამახსოვრებელი და სასიამოვნო გამოცდილება შექმენით;

6. ჩამოაყალიბეთ დიდი საკომუნიკაციო ქსელი და თითოეული ფილმისთვის განსაზღვრეთ აუდიტორია. მიმართეთ ინდივიდუალურ მახასიათებლებზე მორგებულ და გამორჩეულ ციფრულ მარკეტინგს;

7. შესთავაზეთ თქვენს აუდიტორიას სხვა აქტივობებიც (სემინარები, წარმოდგენები, გამოფენები, კონცერტები და სხვა.)